作者: 郭
放小息有兩項指定動作，排隊去廁所及猜皇帝。
對，去廁所是要排隊的，廁所門前總有一條人龍，因為門口有位風紀把守控制人流，一個離開就放一個入去，無多無少。所以有時遲了下課更好，因為人龍開始散去，風紀功成身退，無人把關，便可自出自入。其實去廁所就應該去得暢順，斷斷續續，認真大吉利事。
但去廁所有時都提心吊膽。記得有次廁所內的同學們過份喧嘩，我則正在小解，突然有位女主任走進內，嚇得我幾乎摭唔切，好彩無蝕底。佢姓劉，濃粧艷抹，差不多五十歲，走入男廁美其名為維持秩序，但是否司馬昭之心，我夠膽講句：「真係唔知！」
上完廁所，便上禮堂猜皇帝。香港地乜都要排隊，猜皇帝又係要排隊，排到便猜包剪包?。 總共要猜三個人，過三關，過哂先可以做皇帝。趕時間便玩得簡單點，只猜一個人過一關，三盤兩勝制，皇帝轉得好快。有時猜到悶，便玩拗手瓜，不過學校禁玩。 但細個人人都反叛，越禁越要玩。俾老師捉到，最多都口頭警告，好少罰。
我記得一至三年級在地下大堂小息，四至六年級就在頂樓禮堂。地下大堂仲好似有個阿 嬸當值，她負責倒水。邊位同學口渴便過去飲水，當然，一樣要排隊。但佢得三、四隻杯，都幾唔衛生，好彩我以前有水壼。到我升高年級，阿媽開始每日俾兩蚊我 返學前買麵包，等我小息時充飢。我多數會買火腿蛋，一包兩味，滿足男人貪心慾望。
小息，確實令人懷念。
Comments