作者: 郭
我讀小學年代（1984-1990），升中學要考學能測驗。 於是乎，特別到六年班，便要密密做練習，這是填鴨式教育的指定動作。 記得當年有條練習題好奇怪，大意係問騎單車時，如果要減慢速度，應該：（A）按左邊剎車把手制；（B）按右邊剎車把手制；（C）同時按兩邊把手；還有沒有 D、E、F答案選擇已經不記得。 但未踩過單車，點會識答？ 出此題目者，似乎以為所有小學生都識踩單車，真豈有此理。
學能測驗有邊幾科，真係無印象，大概都是中英數吧，但肯定全部都是選擇題，唔識答都可以亂撞，撞到我遍體鱗傷。 當然，我以為自己好醒，成日唔讀書，做功課又偷懶，學校考試前先會揭下書。 所以，考學能試，我又邊有意識去讀書。
學能試好壞，決定升中派位結果。升讀到頭三志願者，應該考得不錯吧？我升讀張振興，第 十幾位的志願，代表我考得差嗎？ 我不知道，因為無成績單，又無得Check卷。 單靠考試的個多小時決定生死，真有點不公平，但又沒有其他統一評核學生能力的辦法，我也只有接受。 升讀張振興我其實沒有傷心，最傷心只是張振興是男校... ...
Comments