自我品評 作者: 郭

作者: 郭

細個望做大人，大個又唔認老。細個成日以為好醒，點知只係豬頭炳，覺得自己好成熟，其實亦不過乳臭未乾。老實講，我以前覺得自己幾靚仔，仲有戴埋副眼鏡，就非常斯文。又斯文又靚仔，咪溝死女？可惜越大越麻甩，走哂樣。

讀小學時我唔單只虛有外表，亦好有內涵。雖然我讀書唔叻，不過我畫公仔好有心機，同人 拗手瓜又有一手，講普通話又頭頭是道，偷懶就更在行。但這些嗜好到後來便消失了，唯有普通話功力尚可維持。以前我好憎睇書，課本課外書睇見就會訓著，報紙 新聞又唔睇，但我一樣以為自己好聰明，有時甚至睇唔起人，今日至知，咁樣叫幼稚。

人越大，我越低調。但以前，我好多咀。多咀意思唔係聊女仔，只係成日好多野講，講無謂野。咁多野講，可能有時想成為焦點，但又怕烽芒太露，你知我份人好怕羞，唔鍾意做風頭蠆。這些矛盾性格，應該係青春期特徵。